(أمي) قصيدة جديدة للشاعر د/اسامة محمد
أمي
شعر /اسامة محمد
لما جمعت المعاني
والحروف كتبت كلامي
كل إحساسي سألني
هتكتب إيه فوق السطور
ضى الحروف يضوي بنور
أنا قلت هكتب كلمتين
عن حبيبتي ونور العين
اللي شايلة كل همي
عايشة في روحي ودمي
نبض قلبي وعمري أمي
الحروف كانت بتجري
نفسها تدخل في معنى
كل حرف وله حكاية
ويا قلب كبير جمعنا
أمي يا حبي الكبير
نبض عايش جوا قلبي
أرض طارحة وبحر خير
والحقيقة في معنى حبي
شمس تشرق نور ودافية
أمي وافية وروحها صافية
أمي يا سر الحياة
في المحن طوق النجاة
دعوة الصدق في لسانها
يستجيب ربي في علاه
من بداية عمري أمي
هى بيتي وهى سكني
حضنها طوق الحنان
طول حياتي واقفة جمبي
فاكرة يا أمه كل ليلة
كنتي تستني رجوعي
وتلاقيني بإبتسامة
ضي بينور شموعي
ياما كنت أسمع دعاكي
ع الخدود تنزل دموعي
طول حياتك وإنتي صابرة
في الصعاب وإنتي دروعي
أمي إهمسي تلاقيني معاكي
أرض بتزرعي فيها الخير
مهما سافرت وإتغربت
قلبي ألقاه جايلك بيطير
وأنا من غيرك معنى حزين
أنا من غيرك بيزيد همي
عايش عمري عشان أرضيكي
وإنت طريق الجنة يا أمي
أمي ضناكي محتاج حضنك
محتاج قربك طيبة قلبك
محتاج دعوة تنور عمري
أمي أنا نن عنيكي بحبك
الشاعر أسامة محمد
عضو الإتحاد المصري للكتاب
