تايه فى عيونى
شعر/عايدة محمود
واطمن ليه ؟
وانا قلبى وجعنى
يا ناس بايديه
وأفكر ليه ؟
واهو حلم وضاع
وانا هونت عليه
وانا شمس غروب
وتقول للدنيا
تعبت هروب
وأودع ناس
ويقرب ناس
ويموت فى اليوم
مليون إحساس
بكفايه جراح
واهو حلم وراح
من أمته يا ناس
كان فيه فى الدنيا
حبيب مرتاح
وان باعك بيع
وان كان هيضيع
هو أللى اختار
فى الدنيا يعيش
تايه سواح
وقالولى الناس ماشى يطوح
بساعات على بابك ويروح
وانا إيه ذنبى يوجع قلبى
لو حتى القيس بن ملوح
وان مر عليا فى أحلامى
هاخرج م الحلم وينسانى
وان خبط مره على بابى
أعتابى بتتوجع تانى
وفى يوم الصدفه بتجمعنا
بطريق يجمعنا بأوجاعنا
ولمحته لقيته عاشق مسكين
ولغلبه ده مية مليون معنى
أتاريه درويش ماشى يطوح
وفى حضن هوايا بكى ونوح
قال لى أنا تايه جوه عيونك
رحال فى بلادك كيف أروح
ضميته فى لحظه لأحضانى
أنفاسه تطمن وجدانى
نسانى جراحى وأحزانى
خلانى معاه فى عالم تانى
