آية بدر تكتب: شكراً ثانوية عامة
شعر /آية بدر
وتدور سنة وكام سنة ويتكرر نفس اللى فات
زى النهاردة من كام سنة اتكتب عليا أعيش آهات
كان حلمي بسيط إني أفرح وانبسط زى البنات
كانت سنة مليانه تعب، وحِمل من كل الجهات
بَديتها جد مهمنيش ولا اى حد ، وإتكلت على رب بيُحدث المعجزات
لا كُنت أنام زى أى بنت ولا أعيش حياتي زى البنات
عملت كل اللى عليا، ولميت دروسي فى مذكرات
ذاكرت مرة، راجعت ألف، ضغط نفسي، وكل دا أصبح روايات نحكي بيها على اللى فات
قعدت أبني، أكبر، حلم كان نفسي يتحقق، وحلمي طار وساب آثار
شكراً لكل حد كان سبب فى إنى أفشل وجرحه عَلم فيا وساب آثار
شكراً لثانوية عامة اللى ضيعت مني عمري، وزودت من جرحي أكيال
شكراً على سنة بيحسبوها مِقياس.. وهي فى الاول وفى الأخر كانت حظوظ ناس
بس حظي المره ديَ عَلم عليا وساب فى روحي تعب كتير وذكريات....شكراً
