الشاعرة /نهلة الديب تكتب: افرحي يأم الشهيد
شعر /نهلة الديب
__________
ليه يا وَلدي خالفت عهدي
ليه سابقت الموت معايا
كنت بتمناگ تشيلني
فوق كتافگ فالنهاية
كنت عاوزة أتباهى بيگ
بعد موتي .. يوم عزايا
بس يا وليدي القدر
عمره ما بيمشي بمنايا
قالوا ولَدِك نال شهادته
عيني ضعفت من بكايا
ضهري طقطق .. قلت أوعى
تنحني .. إجمد معايا
زي ماشيلته جنين
فوق كتافي هشيل ضنايا
جوا قبره بإيدي أحُطه
وأكتم الحسرة فحشايا
نام يا ولدي وأوعى تزعل
قدري أعيش جوا الحكاية
فاكرة أبوگ .. وأنت عيل
نفس نومتگ .. والنهاية
بس كنت صبية جاهلة
صرختي كانت دوايا
والدموع كانت ونَيستي
عمرها ما قالت كفاية
لكن أنت مَسحْت دمْعي
كنت لي جايزة لشقايا
فاكر إمبارح يا واد
شيلتني لحد المرايا
قولت يا أمَّا الشيب ملاكي
قولتلَگ أنتَ صِبايا
فيگ بشوف زرعي بيطرح
شاب زين نِعم الربايا
قولت يا أمَّا الجنة حلوة
تستحق أغلى الهدايا
فوق كتافِگ زرع طارح
عطره واصل فوق سمايا
كنت قاصد ليه وداع
كنت حاسس بالنهاية؟؟
قلبي قالي والله يابني
شوفت أبوگ ساعة دُعايا
جاي لابس توب معطر
قال وَلدنا جاي معايا
وأنتي جامدة زي ما أنتي
أقوى من كل الصبايا
مهما شيب الشعر غطى
من جمالگ ف المراية
مهما ضهرگ حِمله قطمه
بس صبرگ حُسنُه آية
إفرحي يا أم الشهيد
حتة منگ في الحكاية
إفرحي يا أم الشهيد
جنتگ هي النهاية
.....
