بنت الشتا
.............. شعر عماد سالم
بنت الشتا
بدموعها تحفر ف الجبل
أنهار عسل ..
قمر وجامع نجمتين ..
وراح دخل ..
جوة سحابة واغتسل
هى المثل ..
اسأل عينين الصيادين
اسأل إيدين النحاتين
زى الشجر تطرح أمل
يا تلج مليان بالدفا
قلبى انطفا
إيه العمل ؟
غرقان وفرحان بالغرق
طوقى ومن إيدى اتسرق
حلمى ولا مرة اكتمل
إيه العمل ؟!
مركب ومش لاقية الشطوط
وغريق
ف بحر من الدموع
رافض يموت
وحجارة بتسد الطريق
وبرئ ..
وحيد مش لاقى صوت
السجن يشبه للبيوت
ما اعرفشِ ليه ؟!
الفرح واخد ع الرحيل
على إيه وليه ؟!
حتى الفراق زى النخيل
طويل .. طويل
أطول من العمر الجميل
أكتر من الضحك القليل
يا شمس تاهت فى الطريق
يا سلسبيل
يا عينين بتسرق ضيها
من ضلمة خايفة م النهار
يا نجمة هاربة من السما
يا غنوة ناوية ع الفرار
يا نور ونار
قومى افتحى شباك سماكِ
ع المدى
خلّى الندا ..
يحضن غيطان الليل
يطرح فى قلب الشوك
خضار
أنا فى انتظار ..
خلّى ابتسامتك ..
تحضن الدمع اللى بايت
فوق خدود المحرومين
ليه الحروف الطالعة من قلبك
بتسكن سقف حلق الصامتين ؟!
هو انتِ مين .؟!
حلم الربيع اللى اتخدع
بنت وجدع ..
انتِ الحوارى الضيقة
جواها ناس متزنقة
وقلوبها أوسع م السنين
أول بدايات الفرح
وانتِ الأنين ..
طراطيف صوابع تتشبك
بنت وولد ..
تصحى البلد
تبدأ حكاية عاشقين
انتِ القساوة المفرطة ..
وانتِ الحنين
انتِ الخرافة المذهلة ..
وانتِ اليقين
هاركب بساط الريح ..
واطير
واعلن واذيع ..
واكتب بإيدى على السحاب
بنت الشتا هى الصحاب
هى الربيع ..
هى الحقيقة والمثل
أنهار عسل
قمر وجامع نجمتين
وراح دخل
جوة سحابة
واغتسل
#عماد_سالم
#ديوان_مركب_افكار
#قصيدة_بنت_الشتا
