أحمد ابراهيم احمد يكتب قصيدة بعنوان (يا جبل خف الحمولة)
ياجبل خف الحمولة
مش مقاولة او عمولة
كل يوم بتزيد همومك
وانت وقت الجد واقف
والجميع قطع هدومك
ذنبك أيه؟
حد بس يقول لى ذنبي
ولا يجى حتى جمبى
همستين يمكن اخبى
المرار حتى فى نومك
انت قدمت الكتير
للصغير والكبير
واللى حتى يادوب وطالع
ع الطريق عمال بيحبى
ذنبك أيه؟
ذنب ان الفقر عارفك
بين جيرانك او معارفك
كلهم عارفين حكايتك
ذنبك ايه؟
ياجبل بشويش وهاود
روح لنفس السكة عاود
وارسم الأحلام طريقك
العدو يمكن صديقك
بس لابس وش عيرة
همه ينهيلك مسيرة
كنت فيها سهم صايب
لبسوك كل المصايب
وانت عارف
ذنبك ايه؟
