"الإنسانية" قصيدة للشاعر علاء سعيد
بقلم/ علاء إبراهيم سعيد
إنسانية؟
عشت فيها ب إنسانية
طفحت الدم فى دروبها
و لا خمنت سوء نية
أو إحتمالات لترتيبها
و ماشوفتش منها حنية
ماكنتش من محاسيبها
و ماشربتش لها مية
و لا فتحت لى أبوابها
***
صبرت على صبرى شوية
رضيت بوعدها ونصيبها
دفعت الجذية و الدية
مسدد كل ضرايبها
يا دنيا كفاية تربية
زهقنا نفاق و تورية
دى عمرها جية علية
و بقدرة الله بأغلبها
***
ومهما الدنيا تعصرني
أنا رافض لأساليبها
و لا عرفت تغيرنى
و لا بطلت أعاتبها
و مهما الفقر سهرنى
تجينى شمال أحاربها
و فيها أمور تحيرنى
وبأضحك من مصايبها
***
بتهدى همومها مجانى
لناس عطشانة تشربها
و دنيا السعد نسيانى
و فكرانى فى ألاعيبها
و شاخ قلبى بأحزاني
و شكلي غير حبايبها
أنا ب أكرهها تعبانى
ومش دايب فى دباديبها
***
غريب والضلمة عنوانى
و متدارى فى شوائبها
سجين برى و إحسانى
وعمرى ماكنت بأحسبها
وناس في الفقر بتعانى
و عمر الفقر ما يعيبها
وناس بالضحكة تلقانى
يا ويلى من فى قلوبها
***
فيه ناس الدنيا هدتها
وناس تعرض مخالبها
و ناس الدنيا رفعتها
مسيرها تدور وتقلبها
وناس دنيتها أخرتها
تحارب لجل تخربها
متستعجلش وقعتها
ومتستهونش بعذابها
***
وناس يكفينا نظرتها
بترهب ناس وترعبها
تشق الصف كلمتها
يسيل الشر من نابها
تقلقل ناس فى تربتها
وتحلف كذب بكتابها
دى ناس كفرت بدنيتها
سايسها شيطانها وركبها
