الشاعر السيد طه يكتب قصيدة بعنوان "باكلمني..!
شعر /السيد طه
هاهجر كل كلامكم وامشي
وابني لنفسي دولة جديدة
أصل الشعر مايتعوضشي
لو هاشحت وياه بِجْرِيدة
رعشة حب تخلي القلب
ينقط مانجة
رشة ملح هتعمل
من سمكيتك رنجة
شعرة ف ديل
الفرسة الهايجة
يبقى صهيلها عزف
ونوتة لأحلى كمانجا
ينشع عرقك تكتب ورقك
تنقذ نفسك لو يوم خنقك
حد يقولك بتقلدني
أو بسخافته هيهددني
اوعى تكون ف الشعر سفنجة
جدد نفسك ياابني وحاول
زي المترو ماساب السنجة
امشي ودوس ع المعنى وحرفه مهما الخلق معاك اختلفوا
ياللي عشقت الشعر لذاته
غُوص ف بحُوره
هَتعرف صَدَفُه
(شَخْبط لَخْبط واكسر واُظْبُط جَرَّب كَرْكِب بَهْدِل رَتِّب غَيَّر بَدِّل قَدِّم أَخَّر)
صاحب كل جنون العبقر
فُوق مِنْ أَسْر الكلمة وغَيَّر
كل كلام الشعرا مكرر
امتى نلاقي الشعر اتحرر
اكتب عيد من تاني صياغتك
وانكش ع الإبداع ببلاغتك
وانسف كل كلام مستهلك
واكتب شعر يكون يستاهلك
دغدغ كل معاني الكلمة
المطروحة ف أي طريق
واحبس كل بغال الشعرا
تحت قصايدك ف الأبريق
واخلق شعرك من وجدانك
تلقي الشعر يصيح بآدانك
يحجز لك ف الوادي كيانك
ويرقي الإبداع ف ديوانك
كل الأبجد ملكي وطوعي
يعني مفيش مني ومن نوعي
وف توقيتي هتلقى سطوعي
بانشر فوق السطح قلوعي
عمر الشمس ماتخشى المية
لولا شعاعها ماكانش بخارها اللي بيخلق منها بحارها لما بتعطس أقب وباغطس وألقى الشعر الأصلي يجيني ويمليني ويملا فروعي ..!!!
*************
