محمد سعيد تركي يسأل: انت ليك في القراءة؟؟
بقلم /محمد سعيد تركي
قلت له هل انت ليك فى القراءة
قال لى انا معايا مؤهل عالى
قلت له انت بس بتعرف تفك الخط وبتقرأ الكلمة
ومين اللى قالك أن مؤهلك عالى
هل التانيين مؤهلهم واطى
وليه التانيين بيقولوا على مؤهلهم أنه متوسط
هل هما خايفين أن يتقال على مؤهلهم واطى
طيب اللى معاه ماجيستير أو دكتوراه مؤهلهم عالى ونص ولا عالى بشرطتين ولا عالى متميز
لأنهم خايفين أن الناس تقول عليهم أن مؤهلهم عالى وبس
هتقولى ايه كل الكلام ده انا بس عايز ارد على سؤالك وبجاوبك أن انا بعرف اقرأ
قولت ليه ياحبيبى انا لم اسألك انت بتعرف تقرأ ولا لا
انا قولت ليك
انت ليك فى القراءة
طيب خلينا نغير السؤال
هل انت بتحب القراءة؟
قولت لى اطلاقا انا بتخنق وببقى محتاج اللى يلخصهالى ويقولى على المفيد
ده لو حد اعطانى ورقة بشوف البداية والنص واخر سطر
وطبعا علشان انا متعلم تعليم عالى بقدر اعرف هو عايز ايه
الحمد لله تركت هذا الرجل وانصرفت وحزنت على ايام عمره التى ضيعها فى التعليم وكان ممكن يساعد والده فى العمل ليحسن دخل الأسرة أو أنه يقعد فى البيت يساعد والدته فى خدمة اخواته
كده كان هيكون ليه منفعة كبيرة بدلا من الوقت اللى ضيعه ومصاريف باهظة لا احد يعلم من اين دبروها أهله علشان ننوس عين امه يروح يستلم حتة ورقة مكتوب عليها
شهادة عالية
ونظرا لأهمية القراءة
كانت أول أية نزلت على سيدنا محمد صل الله عليه وسلم
بسم الله الرحمن الرحيم
اقرأ بِاسْمِ رَبِّكَ الَّذِي خَلَقَ (1) خَلَقَ الْإِنْسَانَ مِنْ عَلَقٍ (2) اقْرَأْ وَرَبُّكَ الْأَكْرَمُ (3) الَّذِي عَلَّمَ بِالْقَلَمِ (4) عَلَّمَ الْإِنْسَانَ مَا لَمْ يَعْلَمْ {العلق: 1-5}
صدق الله العظيم
لقد صادفت كثيرا من الناس لم يحصلوا على اى شهادة حتى لو ابتدائية ويحبون القراءة ولديهم شغف الحصول على المعلومات ومحاورة المثقفين
ولما تبدى إعجابك بهم وتسألهم عن ماحصلوا عليه من مؤهل تجدهم قالوا للاسف لم ننال حظنا من التعليم لضيق ذات اليد
اتمنى ان يزداد اعداد المحبين للقراءة فهى الإضاءة الطبيعية للعقل
بقلم / محمد سعيد
اخصائى النفخ فى القرب المقطوعة
