الشاعرة حنان شاهين تكتب: احساس غريب
شعر/حنان شاهين
إحساس غريب حساه
حد تاني جوا مني
بيخاصمني و يصالحني
و يعاتبني و يسامحني
حد يمكن شوفته صدفة
احتمال يشبهني حبة
و احتمال يشبه لواحد
عاش بطولة في فيلم صامت
و لا بنت في دور رومانسي
كنت باحلم اني أعيشه
بس لسه ما عشتهوش
رغم إن الدور مكرر
و المشاهد هي هي
بس مش نفس الوشوش
حتي وشي في المرايا
مرة أشوفه غريب عليا
و مرة أشوفه بيتسم لي
بكل طيبة
خايفة ليه ؟
دا احنا واحد متخافيش
حاسة إني روح غريبة
حتي عن جسمي اللي احيانا باحسه تقيل علي
و ماشية أجره في الشوارع
و نفسي أسيبه في أي حتة
و أطير خفيفة
زي نسمة اتمردت
على موجة حارة
زي فقاعة هوا أمنت بأن العمر لحظة و انطفت بهدوء شديد
زي شجرة برتقان
مرة حسيت إني هي
عايشة فيها و عايشة فيا
برتقانها طرح في صدري
و من صوابع إيدي اتمدت فروعها
من جدورها شب عودي
و من وريدي نبتت فيها الحياة
صوت موسيقى جوا مني
سيمفونية
كل نغمة روح جديدة
ساكنة فيا
ضي خافت مس روحي
و شيء غريب بيشدني ارحل معاه
شفرة و لا ومضة دافية يا الحياة ؟
