سيد عبد الحفيظ "الأهلي بيتي ولا يجوز نقل الأسرار للاخرين"
النهاردة سيد عبدالحفيظ كان ضيف في برنامج مهيب عبدالهادي، مهيب في أول الحلقة سأله الناس كلها عايزة تعرف اسباب رحيلك ع الاهلي
رد سيد عبدالحفيظ كان ان مع احترامي ليك يا مهيب لو انت فاكر اني جاي النهاردة اقطع في الناس اللي في الاهلي واصفي حسابات فانت غلطان، الحاجات اللي مكانش ينفع تتقال وانا مسئول في الاهلي عمري ما هقولها بعد ما سبت النادي فمتتخيلش اني ممكن اقولك تفاصيل الجلسة الاخيرة او الكلام اللي دار فيها لان لو علي موتي فانا عمري ما اطلع اسرار الفريق
ولما مهيب سأله اتبلغت بخبر رحيلك ازاي، قاله اتبلغت عن طريق جلسة مع لجنة التخطيط وفكرة ان سيد يمشي حاجة عادية ووجهة نظر النادي وبحترمها واتخن من سيد ١٠٠ مرة ممكن يمشي بس ممكن اللي ضايفني اني كنت احب اتبلغ قبلها بيوم او اتنين بالموضوع مش وقت الجلسة
مهيب حب يشبط في الموضوع ويسخن الدنيا وقاله ياااه معقول اتبلغت برحيلك بين يوم وليلة كده؟! قاله يا مهيب عشان نقفل القصة حتي لو ده كان ضايقني لكن في النهاية انا بقالي حوالي تلاتين سنة في الاهلي سواء لاعب او مدير كورة وعشت في الاهلي اكتر ما عشت ف بيتي وليا ذكريات كتير جميلة فمش هسيب كل ده وامسك ف موقف واحد ضايفني القصة بالنسبالي انتهت والاهلي هيفضل بيتي وهفضل اخدم الاهلي سواء ليا منصب ف النادي او لا
واما سأله عن خالد بيبو ومقارنة الناس مابينهم كان رده ان بيبو اخ وصديق وواكل معاه عيش وملح وبيتي قبل مكتبي مفتوحله في أي وقت وجمعتني بيه بعد تعينه اكتر من مكالمة وبتمناله النجاح والتوفيق
الصراحة لقاء عظيم من سيد عبدالحفيظ، يعرفك ان الراجل ده معجون اهلي سالك وابيض ومش بتاع تصفية حسابات ولا صراعات شخصية، وباذن الله نشوفه قريب في الاهلي تاني ايا كان المنصب لان اللي زي سيد اضافة لاي مكان هيكون موجود فيه ❤️
