سلوى الشامي تكتب: أنا الزمان
"أنا الزمان "
بقلم /سلوى الشامي
أنا الزمان إلى راح وخد الحلو وياه
أنا الزمان إللي شهد أجمل أوقات
شوفت جدودك قاعدين على المصطبة
الحكاوي ولا ألف ليلة وليلة
فاكر كمان اللمة والزحمة في العيلة
فاكر أم وجهها بشوش
الضحكة صافية نابعة من قلبها
فاكر أب كان بسيط
الرضا والقناعة غطاه
عمره ما شال هم بكره
كان يقول كل يوم ليه رزقه
أنا الزمان شهد على ناس
وقت الحزن الكل اتكسى بالاسود
يشاركوا ناسهم في عزاهم
لا ضحك ولا هزار
إزاي يجيلي نفس أفرح واخويا زعلان
أنا الزمان شهد على ناس
وقت الفرح الكل بيبارك ويهني
الكل سعيد وبيغني
أنا الزمان إللي كله ذكرى جميلة
أنا الزمان إللي خد الناس البسيطة
خد منابع الدفا والحنان
أنا الزمان إللي أخذ القلوب الصافية
أنا الزمان إللي مشي وسابلك
شوية صور وذكريات
