الشاعرة شريفة خلف تكتب: ياقلب السنين
بقلم / شريفه خلف احمد
يا أكتر حب علِّمني
أعيش العمر وحداني
يا أكتر نقطة كات ضعفي
وبرضه وجودها قواني
يا أكتر حد خلاني ..
كرهت الحب وعشقته
حلمت أعيشه ورفضته
بقوّي القلب في حضوره
وبضعف لما اجيب سيرته
بحب الحب اه كرهته
وبكره نفسى على شأنك
عشان الوجود فيا بينده لك
ويبعد عنك الاحزان
ويوصف قربك الدامى
بحب الحب من اجلك
وبرضه كرهته من اجلك
يا أكتر قلب طمنّي
وجمِّد قلبي ع الأعداء
وأكتر قلب خوفني
ولو قرّب .. بقول يافراق
يا حضن حنانه دمرني
يا أعظم عشق يكسرني
يا أكتر حد قدمني
وبرضه بحبُّه أخَّرني
يا أكتر عشق هنَّاني
وعشت معاه معاني الفرح
وأكتر عشق بكاني
وبكفوفه سقاني الجرح
يا جنة وقلبي رايدها
ونار انا بدعي يبعدها
يا كلمة بتحيي أيامي
وبسهولة تموتها
يا أكتر حد ضحكني
وكانت ضحكة مالهاش زي
وأكتر حد حزِّني
على عمري اللي راح والجاي
يا كل الراحة والأوجاع
يا سكة دليلي فيها ضياع
يا عكس الحاجة واساسها
يا شاريني!! وهواك بيّاع
ياقلب السنين
ياشوق وحنين
