الجدعنة اتسرقت مننا رحلة في شوارع مصر عشان نلاقيها
بقلم : احمد ابوسمك
في الشارع محدش بيمثل هنا بيتكشف كل واحد على حقيقته الكلام الكبير بيتقال في الاستوديوهات بس الامتحان الحقيقي بيبقى في الشارع المصري ده مش أسفلت وعربيات وخلاص ده كاشف معادن هنا القناع بيقع والجدع بيبان واللي لابس دور بيتهز في اول مطب الشارع مفيش "بعدين هبقى كويس" في الشغل ممكن تأجل في البيت ممكن عشان بتاعك بس في الشارع؟ عربية عطلت قدامك هتزق ولا هتكمل مشي؟ واحد وقع قدامك هتقومه ولا هتبص في الموبايل؟ واحد بيعاكس بنت ماشية هتتكلم ولا هتقول "ماليش فيه"؟ الشارع بيحطك قدام نفسك مفيش وقت تفكر يا إما تطلع اللي جواك يا إما إن مفيش حاجة جواك أصلا الكلام ببلاش بس الموقف تتقدر بفلوس كلنا بنعرف نتكلم "البلد عايزة تتعدل " الناس مبقاش عندها أصل "مفيش جدعنة "
الكلام حلو ببلاش بيتقال على القهوة مع كوباية الشاي المظبوط و الشارع بيقولك وريني جدعنتك و إنت متاخر على شغلك وريني أصلك وإنت واقف في طابور العيش وريني احترامك و إنت متضايق و اللي بيصبر هنا هو اللي بجد و اللي بيكبر دماغه هنا هو اللي بجد برضه مفيش تمثيل الشارع بيعلمك إنك مش لوحدك بغض النظر عن الزحمة والزعيق الشارع المصري فيه حاجة غريبة الشارع بيقولك كل يوم " احنا لسه فينا خير" مش خير في منشور على فيسبوك خير بيطلع غصب عنك وقت الموقف انت فاكر إنك بتعدي في الشارع و خلاص؟ لا ابتسامتك بتعدي كلمتك الحلوة بتعدي حتى صمتك بيعدي زمان الجدعنة كانت حاجة بتتعمل وتتسكت عليها دلوقتي أي موقف حلو لازم يتصور و يتحط علي السوشيال ميديا ده مش وحش بالعكس دا بيخلي الناس تقلد بس الخطر إننا بقينا نعمل الموقف عشان نتصور مش عشان هو ده الصح الجدعنة بقت "محتوى" و لسه فعل الشارع هو اللي بيمتحن الأصل و في البيت و الشغل كلنا لابسين أحسن لبس الشارع بيقلعك الشارع بيحطك في اختبارات لو بكرة الصبح حصل قدامك موقف والناس كلها ساكتة هتكون أنت الشخص اللي بيتحرك ولا الشخص اللي بيصور؟ إحنا لسه جدعان ولا بقينا بنمثل الجدعنة لما الكاميرا تفتح؟ الإجابة دي هي اللي هتحدد إذا كانت الجدعنة اتسرقت مننا ولا إحنا اللي خبيناها ولسه نقدر نطلعها رحلة في شوارع مصر عشان نلاقيها
