رغيف العيش
شعر/بلال الشافعي
رغيف العيش يارغيف العيش
مين اللى شحطك يارغيف العيش
وقل قيمتك خلاك مافيش
قولى بصراحه وماتخبَّيش
الله يرحمك يارغيف العيش
كنا بنكلك عشان نعيش
دلوقتى مابنكلك عشان نعيش
مخبوز على نشاره ولا حشيش
والعشرة منك مايعشونيش
الله يرحمك يارغيف العيش
كنت كبير وقيمتك كبيره
واللى يشوفك يقول فطيره
معجونه بسمنه وخميره بيره
ورغيفين تلاتة يأكلو عيله
الله يرحمك يارغيف العيش
اتفقوا عليك معدومى الضمير
ومافيش رقابة ولا متابعين
كل يوم عن يوم بتصغر
وانت اللى فاضل قوت الفقير
الله يرحمك يارغيف العيش
ياخوفى عليك فيما هوآت
يعملوك برشام ولاَّ كبسولات
وبدل مانصرفك من الطابونه
نصرفك من الاجزخانه بالروشتات
الله يرحمك يارغيف العيش
وقال اية الحكومة قالت
ليكم الإختيار
مش عاجبكم طبونه
فيه غيرها كُتار
وسابوهم يتحكمو فينا
مجموعه من الأشرار
وأصبحنا كالمستجيب
من الرمضاء بالنار
الله يرحمك يارغيف العيش
صوتنا اتنبح ياخلق ياهوه
الرغيف بيموت إلحقوه
يرد علينا أصحاب المخابز
أعلى مافى خيلكم إركبوه
طبعآ ماهم واثقين ومتأكدين
إن المعلوم واصل لمين
وإن مهما تشتكونا
ودن من طين وودن من عجين
الله يرحمك يارغيف العيش
قلنا هنشتكى للعزيز الجبار
اللى لا يغفل ليل ولا نهار
هوه اللى يقدر يفصل بينا
مظلوم فى الجنه وظالم فى النار
أنا عندى حل ليكم
تركبوا كاميرات
تصور حالة الرغيف
فى جميع الخطوات
ومفتش التموين
حاضر ولآ فلاش
وكاميرا للجمهور
تسجل الإعتراضات
