طوق نجاة قصيدة للشاعرة نهلة الديب
شعر /نهلة الديب
.....
جوايا لسه بنوتة حلوة
يدوب بتحلم بالحياة
تضحك لحرف جوة غنوة
وبدون شعور تبكي معاه
شايفة الأمل مزروع جناين
وعمرها ما شافت سواه
كانت في عز الضلمة تمشي
وكأنها ضامنة النجاة
فرحانة وسط قلوب جميلة
وف يوم وليلة أمانها تاااه
صبحت وحيدة..بقت شريدة
صحيت من الأحلام بآآآه
حتى الورود أوراقها دِبْلِتْ
والشوك بقى فكل إتجاه
بنوتي ماتت من جروحها
وأنا لسه بحلم بالحياة
لكن مادمت أنا لسه صاحية
هكون ل روحي طوق نجاة
........
✍️ #نهلة_الديب
