شعر/عماد سالم
يا أول بنت
سابت باب الجنة بعدها مفتوح
لسه الكلام مش راضى يطلع
من شقوق الصمت
يسكن معانى توصفك
انا المجروح
من وحدتى
ياترجعينى لجنتك
ياتعلمينى ازاى أغنى وابوح
اتنين اتنين
الكل طلعوا المركبة
وانا لسه وحدى يانوح
لو توعدينى
تكونى سكنى ف الطوفان
راح اسيب مراكب نوح تعدى
وبأمان
وافضل معاكى لوحدنا
والموج بيحضن قلبنا
يانن عين الروح
انتى بداية الأزمنة
أول نهاية وحدتى
يادنيتى
إتكى على موجى اللى هربان م الطوفان
انتى الأمان المحتمل
وانتى الأمل
فى عنيكى بحلم بالغرق
وياكى حاسس بالأمان
رغم الخطر
طيفك خطر
على بالى تبقى لى شراع
وانا قلبى مركب طيبة
وشراعها ضاع
سامعة ادان المركبة
اتوضى
من دمعى اللى خايف تبعدى
صلى صلاة الحب
نجيى الغرقانين
مش نوح لوحده ياحبيبتي
الدنيا فيها مركبين
مركب تعدى من الطوفان
ومركب لنا
نعيش عليها لوحدنا
ونبقى حاسين بالأمان
رغم الطوفان
هافضل أردد غنوتك
بلحن له جناحات كتير
ما انا قلبى طير
عارف طريقه لغيتك
يعرف يطير
لو كنت بس كتبت لك
عنوان مكاننا ع القمر ؟!
قلبك يجيبك نحيته
أول ما يشعر بالخطر
لو كنت بس رسمت لك
أول خريطة للوجود
كنا عرفنا ياحبيبتى ازاى نعود
ازاى نخلى لينا خلود !!
نبقى الوجود
ازى تكونى انتى القمر ؟!
والكون ونوره ضحكتك
واحنا الحقيقة المظلمة
وادينا كل الكون دا نور
قبل العبور
من تحت ايد البحر نجرى
م الطوفان
