صاحب العقل يميز
بقلم / محمد سعيد تركى (اخصائي نفخ قرب مقطوعة )
أنا اجلس على الحياد
لانى لا احب تشجيع كرة القدم
ولا انا صعيدى ولا بحيرى ولا الهوى رمانى
وبعيدا عن اى نظام جديد او قديم
أنا بطلت أربعة أنواع من البرشام
سكر وضغط وسيولة
ده مش علشان أنا خفيت
لا ده علشان أنا لم يتم شفائى من ما كنت اشكو منه وهو تنميل فى نصف قدمى الأمامى وبعد خمسة أشهر كاملة وكل يوم اربعة انواع من البرشام بمجموع ستمائة برشامة فى خمسة شهور
وبغض النظر عن ثمنهم لان الارزاق والإعمار بيد الله يبقى ليه استمر فى علاج غير مفيد وانا بأتناول برشام لأمراض لا اشكو منها غير ما شعرت به من تنميل قدمى
فهل استمر فى العلاج حتى اصل الى مرحلة الغسيل الكلوى ؟
مثلما أكد الدكتور المحترم العالم بامور مهنته حسام موافى
حين قال
أن نصف الناس التى تغسل كلى بسبب الادوية
والمرحلة دى تبقى اخر محطة قبل الوفاة
ليه كده يا دكاترة
فهل ينطبق عليكم المثل القائل
أن طاب المريض فهذا من حظ الطبيب
فهل جعلتمونا حقل تجارب لشركات الأدوية
وانتم تفوزون بعمولة هذه الشركات لما تجربوا فينا ادويتهم الجديدة
اتمنى انكم ترجعوا ملائكة رحمة زى زمان
ايام احمد ابراهيم اللى بعت بنته تجيب له الدوا اللى كان فيه سم قاتل
فاكرينه طبعا
لان النهاردة اصبح المبدأ زى اى تاجر خضار او خردة
المكسب ثم المكسب ثم المكسب والجنيه هو سيد الموقف
ولو العيان مات مافيش مشكلة ولا اى مسؤولية قانونية وممكن نعرض على اهله شوية فلوس وناخد منه اى حاجة تنفع تتباع
كل ده كوم وكتيبة المجاملات الطبية كوم تانى
لما تروح تكشف عند الدكتور ويطلب منه شوية فحوصات ولازم تعملها عند معمل تحاليل زنوبة وتعمل بالمرة اشعة عند زعبلة اسكان وبعد كده يكتبلك روشتة فيها من خيرات الله اشى مستورد واشى فاخر ويا سلام لو فيه جنبه صيدلية وتسمعه يقولك هات العلاج ده من الصيدلية القريبة علشان اطمن أنه الاصلى ومش بديل وكمان اقولك تستخدمه ازاى
وانت تكون اصلا دافع دم قلبك فى الكشف علشان الروح غالية سواء روحك أو روح ابنك أو روح ابوك أو روح امك
وكده السبوبة تكبر والعمولة تبقى مضمونة اشى تحاليل واشى أشعة واشى أدوية
وكمان بتبقى حاسس انك لو ما سمعتش كلام الدكتور ممكن يحصل حاجة وحشة
لان الدكتور عنده ضمير صاحى حبتين وبيقول لك انك لو ما سمعتش الكلام هيحصل مضاعفات صعبة جدا
تقوم انت تستلف من طوب الارض او تعمل قرض من البنك أو تبيع عفش بيتك
يااااااااه
اتارى النظام الغذائى اللى اتربينا عليه هو السبب الرئيسى اللى مخلى الدكاترة تحبنا وتطلبنا دايما
وزغردى ياللى مانتش غرمانة
ودوخينى يالمونة دوخينى
الحمد لله وبعيدا عن اى نظام
فإن العمر واحد والرب واحد
فمن لم يمت بالسم مات بغيره
وعلشان احنا دايما ناس طيبين لازم نعرف المرحوم مات ازاى
غرقان ولا محروق ولا متكهرب ولا من السرطان ولا من فيرس سى ولا نزل على جدور رقبته ووقع من البلكونة
ولما نكتشف إنه مات من غير اى حاجة من اللى احنا نعرفها
نقول اكيد مات بالسكتة القلبية
يعنى كل اللى ماتوا بالاسباب السابقة فضل قلبهم شغال من سكات أو سكتات
وعلشان احنا فعل شعب طيب جدا جدا بنقول لما يتحرق اصل المؤمن متصاب
لكن لما ربنا ينجيه نقول اصل النار مش بتحرق مؤمن
وربنا يخلينا واحنا نفضل مؤمنين كده على طول
يارب اهدينى واهدى الناس التانيين
