طريقة عمل القرص الطرية
كتبت : ياسمين عبد اللطيف
المقادير :
نصف كيلو دقيق جميع الاغراض حوالى ٤ كوب دقيق.
معلقه كبيرة خميرة فورية.
معلقه كبيره سكر.
نصف معلقه صغيرة بيكنج بودر.
ملح.
ربع كوب زيت.
ربع كوب سمنه سايحه و يفضل سمنه بلدى .
لبن رايب دافئ للعجن.
الحشو :
حسب الرغبه حلو او حادق
جبنه بيضاء
عجوه بشويه سمنه عالبارد يعنى من غير ما نحطها عالنار علشان ماتنشفش جواه القرص بعد التسويه
الطريقه :
هنجيب بوله و نحط فيها شويه من اللبن الرايب الدافئ و الخميره و السكر
و نقلبهم كويس و نغطيهم و نسيبهم ربع ساعه يتفاعلوا مع بعض و فى بوله تانيه هنحط الدقيق و الملح و البيكنج بودر
و نقلبهم كويس و بعدين هنضيف الزيت و السمنه
و بعدين هننزل بخليط الخميره و بنضيف اللبن الرايب بالتدريج حسب ما العجينه تاخد معانا
يدوب لغايت ما تبقى معانا كويسه و بنغطيها و بنسيبها تخمر لغاية ما يتضاعف حجمها
و بعدين بناخدها و بنقسمها لكور حسب الحجم اللى نحبه و بنغطيهم و بنسيبهم يرتاحوا حوالى ربع ساعه
و بعدين بنسيبها ساده أو بنحشيها حسب الرغبه و بنخلص الكميه كلها و بنضفهم على صينية الخبز
و بندخلهم فرن سخن على الرف حرارة 200 بياخدوا من ربع ساعه
إلى ثلث ساعه مش اكتر علشان ماتنشفش و اول ما نطلعهم من الفرن بنغطيهم بفوطه نظيفة نحافظ على الرطوبة جواهم و يفضلوا طريين و لما يبردوا تماما بنحتفظ بيهم فى كيس بلاستيك محكم الغلق
علشان ما ينشفوش و اللى يزيد عن استهلاكنا نشيله في الفريزر على طول حتى يفضل معانا طازة .
