محمد جمال يكتب: ماذا بعد انسحاب الاهلي من الدوري؟؟
( بصراحة )
بقلم / محمد جمال
- تخيل معايا كده فاروق جعفر بيقول إيه :
دوري السنادي "مشـبوه"، لما نرفض تحكيم أجنبي في
ماتش الأهلي ونطالب بتحكيم أجنبي مع بيراميدز يبقي الدوري مشـبوه .
على فكره نادى الزمالك اليومين دول سمك لبن تمر هندي ، ماتعرفش مين بيدير الزمالك ؟
هل هو ميدو ولا ممدوح عباس ولا حسين لبيب ولا العدل جروب ، بصراحة رؤساء الزمالك بقوا كتييير .
وماتعرفش لهم أى هوية هل هم بيحبو التحكيم المصرى ولا ضده ، كلام غريب وقرارات متضاربة .
من الواضح إنك اعتمدت نزاهة التحكيم المصري قدام الدنيا كلها ومش هتقدر ترفع عينيك في عينهم وتعترض بعد كده .
والأدهى من ذلك والأشد غرابة أن عندك أزمة مالية لكن تبيع تاريخك بشوية دولارات عشان بيراميدز ياخد الدوري 🤔
والله عيب عليكم ، وبعدين تحس بفرحة عارمة عند جمهور الزمالك الذى من الواضح انك محتاج وعى من جديد لما يدور حولك من أحداث !!؟
طيب الفرحة دى هل هى فرحة حباً في بيراميدز ولا كُـرهاً في الأهلي ، وللعلم الدورى المصرى ليس له شكل بدون الأهلي والزمالك والاسماعيلى والمصرى
#وبصراحة ده شغل صبياني من ميدو وتهريج ونقطة سـودة في تاريخ نادي الزمالك لا نتمناه .
#بصراحة اتحاد الكرة والرابطة ولجنة التحكيم انا شايف بدل مايفلت الموضوع من ايديكم قوموا باتخاذ قرار بإلغاء الدورى ووقف هذه المهزلة لأن مايحدث من تخبط يوجه نادى زى الأهلي ينسحب طيب هينضم له أربع فرق تضامناً بالإنسحاب
يبقى موقفك انت ايه ؟
وطول عمرنا ماشفناش فى دوريات العالم أن فيه فريق ينسحب وبعدين نمسك مدير الكرة بالنادي الأهلي نعدمه لأنه متضرر من التحكيم وسوء إدارة الرابطة ويبدو أن كلهم قبضوا الثمن عشان بيراميدز ياخذ الدورى والله عيب عليكم
وطبقاً لعنوان منشورى بصراحه
#بصراحة :
- مطلوب نقطة ومن أول السطر ، مطلوب تسويق للدورى المصري حتى نستعيد مكانته التى تراجعت كثيرا
- مطلوب دعم كل الأندية للنهوض بالكرة المصرية ونرجع لسالف عهدنا أيام كنا بعبع لأفريقيا .
- مطلوب مجلس قوى متمثل فى اتحاد يدير الكرة فى مصر ولا يلتفت للتعاملات المشبوهة والتى تضعه فى موقف شك نحو تقاضي أموال وما أشبه .
- مطلوب عمل دورات تثقيفية للحكام ومحو أميتهم لكى يكونوا نموذج يحتذى به .
على الخطيب ومن معه التواصل مع باقى الأندية باتخاذ قرار إلغاء أو انسحاب من الدورى المشبوه والتفرغ لكأس مصر وكأس الرابطة .
وللعلم فى ناس فرحانين بإيقاف الخطيب وتعيين مؤقت
ل طاهر ابو زيد ومجلسه وطبعاً المفروض لما تكون خصم لأى حد خليك خصم محترم ولاتنسى مافعله الخطيب ومجلسه من إنجازات تحسب للتاريخ .
#بصراحة مطلوب من كل الأندية الاعتماد على الناشئين وتصعيدهم للفريق الأول لكل نادى وعدم الاعتماد على أى لاعب محترف كى نستعيد مجد الكرة المصرية
( إمضاء عاشق )
محمد جمال
