المطربة « آيه عبدالله» في حوار خاص لمجلة أيامنا
**الكلمة الحلوة: معناها وجود وإحساس جميل
**اغنية أصعب إحساس ،اخترتها لكلماتها الحلوة واحساسها وأغنية اللى باعك بيعه
.
**اللى حابب يدخل الفن اولاً لابد أن يتدرب بو كاليز ،ويسمع أغانى من غير ما يغنى معاها وافضل شيء يكون وسط مجموعه
حوار/ مهرائيل سعد
نبداء الحكاية ؛ حكاية الصوت الأصيل واللى فعلاً تسمع منه أحلا كلام يريحك ويطربك فى زمن ملئ بالازدحام مليان كلام ،والشاطر اللى يعرف يختار ويسمع الكلمة الحلوة المعبرة من فنانة مؤثرة صوتها يسحرك إختيار كلماتها تبهرك.
مجلة أيامنا تستعرض لكم أهم إنجازات بأحلى كلمات المطربة المصرية الجميلة (أية عبد الله)
البداية :آية طفلة كانت تبلغ من العمر أربع سنوات ،مع أب بيحب الغناء بيسند ويعلم ويساعد ويوجه ولا يتخلى عن أحلام أبنته ولكن ساعدها على تحقيق هدفها مع المايسترو سليم سحاب بدار الأوبرا المصرية.
آية الفنانة المصرية من أصول صعيدية
عاشت ونشائت فى القاهرة.
آية ،شايفة نفسك فى التمثيل أكثر ولا الغناء؟
شايفة نفسي فى الغناء أكثر
مين مثلك الأعلى فى المطربين ؟
سيدة الغناء العربي أم كلثوم،تامر حسنى ،عمرو دياب لأن لهم مسيرة فنية خاصة.
احكيلى كواليس الغناء مع وائل جسار ؟
كانت حفلة رائعة وائل جسار من أجمل الشخصيات هو إنسان محترم وراقي جداً فى المعاملة وكنت سعيدة بالغناء معه.
بتحبى مين فى الممثلين نفسك تمثلي معاه؟
بحب كل الفنانين
اكتر اغنيه حسيتي بيها وانتى تغنيها ؟
كل غنوة غنتها حسيت بيها وبكلماتها ،من أهمهم اغنية أصعب إحساس ،اخترتها لكلماتها الحلوة واحساسها وأغنية اللى باعك بيعه.
مين اللى اية راهنت عليه خزلها وغنت أصعب إحساس بإحساس قوى؟
لا محدش خزلنى واخترت أصعب إحساس لكلماتها والدرامة اللى فيها ومعنى الكلام
مخفتيش وانتى تتحدى أفخاي أدرعي بأغنية انا دمي فلسطينى ؟
لا مكنتش خايفة ولكن كان واجب عليا التحدى ،وكل عربى لازم يتكلم إن الأرض فلسطينية محدش فينا هيقبل يقتلو أخواتنا ،لازم ندعمهم ونقف جانبهم،مفيش بشر يقبل اللى فى الفلسطنين.
عملت اغنية جميلة لفلسطين ،كلمتها جميلة كتبها حسان الرفاعى والملحن كريم فتحى
الموزع إسلام حسن.
وعن حياتك الشخصية الجمهور بيقرب من الفنان اكتر لما بيفتح قلبه ،هل لكي اخوات ؟
عندى اخت واحدة أكبر منى كانت فى الغناء قبلى ولكن أنا كملت المسيرة، وعن الأرتباط انا مخطوبة وعن قريب الزواج بإذن الله.
بتحبي مين من الشعراء تغني له كلمات ؟
مش أي كلمات ولكن احب الشاعر بقلمه وكلماته الراقية.
أمير طعيمة ،أيمن بهجت قمر، عزيز الشافعى برغم أنه ملحن ولكن بيكتب أغانى جميلة جداً.
من سنة ٩٥ إلى ٢٠٢٥أهم الأحداث المؤثرة في حياة آية ؟
من أهم الأحداث فى حياتى دخلت برنامج صوت الحياة وكانت لجنة التحكيم بها فنانين عظماء حلمى بكر الله يرحمه ،هانى شاكر ،سميرة سعيد وكان حلمى بكر قوى جداً وعنده ملاحظه ولكن كان يسعدنى مدحه فيا وكنت بذاكر واركز ودا كان من أهم الأحداث.
حدث مهم وفاه والدي ٢٨/٢/٢٠٢٢ ،تأثرت بهذا الحدث لسنوات وفى شغلى كنت من الصعب أن اتجاوب بابا كان معى فى كل حاجه.
ومن أهم الأحداث وقت خطوبتي ٩/٢٨ -٢٠٢٤ ،سفري للعمرة أنا وماما ٢٠٢٤/وفى أكتوبر من أهم الرحالات وكانت الروحانيات عالية فى زيارة الكعبة.
مين مثلك الأعلى؟
النجاح هو مثلى الأعلى صفات مش أشخاص وحل أي مشكلة.
دور ماما فى حياة آية ؟
هي كل حاجة هى الأمان فى كل مشوار حياتى،ماما فى الحفلات بتاخد بالها منى ومن اكلى بكون تعبانه ماما بتعطينى بور، لما تكون مامتك جنبك بتعرفي إن كل حاجة حقيقية لأن لا يوجد مصلحة فى الأمر.
مين رشح آيه تغنى أغنية الليلة فى مسلسل (طاقة حب)؟
نجلاء رشدي منتجة المسلسل والمسلسل حقق نجاح وصدا كبير مع الجمهور واذاع على عدة قنوات منهم صدى البلد.
رصيد آية أكثر من. ٣٥ اغنية. لو هتختاري خمس أعانى مميزين فى رصيدك بتختاري اي؟
بختار أنا صعيدية وابويا صعيدى ،اصعب إحساس اللى باعك و سمعنى كلام.
آية بتقدر تبيع اللى باعها ؟
أوقات بعتزل ما يؤذينى ،ممكن اوقف العلاقة أو التعامل ولكن بيفضل فى ود مش بطبيعتي ولا صفاتى أنى أبيع.
آية عاطفية ام عقلانية ؟
نسبة العقلانية أكبر فى حياتى.
كان سهل تغيري ل شعبي ؟
أنا بغنى كل الألوان لقيت نفسي فى الشعبى الطربى
وعملت اغنية اللى باعك.
بغنى شعبي فى الحفلات وعندى خبرة وفى برنامج سهرانين مع أمير كرارة
غنيت بتندينى تانى ليه ،و حلاوة روح.
لو قلتلك أختاري مطرب تغنى معه ديو ؟
تامر حسني نفسي أغنى معاه.
لو هتغنى لجورج وسوف تغنى إيه ؟
أغنية بتاعت الفنانة فاتن فريد بس حلوة من جورج وسوف ،اللى تعبنا سنين فى هواه
ولجورج وسوف سبت كل الناس علشانه.
ولو ل الفنانة الجميلة سميرة سعيد تغني اي ؟ اغنية ع البال ،و محصلش حاجة.
لما تعرضت آية للخداع على فيس بوك من انتحال شخصية لمخرج.. أخبار الثقة عند آية اي ؟ لا الحمد لله أنا مبخبيش حاجة على بابا وأول ما كلمنى وطلب طلبات حكيت لبابا قال إنه شخص مزيف ، كلمت فعلاً المخرج محمد فاضل وهو اللى شجعنى أن اكتشف المنتحل شخصية المخرج وبيستنزف البنات وحذرت البنات منه وعملت له محضر .
النصيحة اللى آية تقدمها للبنات اللى نفسها تغنى.. كيف توصل إيه بتدرس و يكون أفضل؟ نصيحتي لكل اللى حابب يدخل الفن اولاً لابد أن يتدرب بو كاليز ،ويسمع أغانى من غير ما يغنى معاها وافضل شيء يكون وسط مجموعه وينضم لفرقة على المسرح ليكون قادر على مواجهة الجمهور ،
ويدرس بجانب الغناء مثل السوشيال ميديا والتسويق يقراء كثيراً ولابد من تجربة كل الألوان الغنائية وكل دا بيقوى الفنان
